عجبا !!

بادرنا عنوان في أحد "المنشورات" المحلية بارات ومراقص ديسكو.. وعمّك اصمخ!! الا ما عنده أذن و علامات الاستغراب و التعجب لوجود هذه المقار في الكويت ... دوّر لي واحد "عايش" بالكويت مو نايم في البيت ... ما يدري!!! ... حاولنا نبحث في سر "ترك القرعة ترعى" ... واحد يقول مؤامرة على أخلاق الأمة (حبيبي !!! أمتك دايخة و خالصة من غير مؤامرات) ... واحد يقول: متنفعين بالبلد (عزيزي !!! ترى المتنفعين ما يبون عيالهم مسطولين أها الا اذا يبون يسطلون عيال الناس بس ... لكن راح يحوشهم طشّار) التفسير مو مقنع !!!! ... واحد يقول: الفلوس حلوة و غالبية الصبيان اللي يديرون المقار خريجيين سجون لأحد الدول العربية و اللي كافلينهم شوية عفطية مهما بلغوا من المقام !!!! لأ التفسير مو مقنع بالمرة ... لازم نفكر في نفسية الزبون ... يعني لو ان ما في زبائن راح تشوف سوق؟؟؟ أكيد لأ ... اذا فهمنا الزبون نفهم سبب وجود السماسرة و بالتالي سبب احتراف هذه التجارة ... كما أخبرني أحدهم "مستحيل في أنس من غير ناس و لا فرفشة من غير محد ينداس" !!! حكيم و الله ... اما نفسيات الزبائن :

• زبون لايعة جبده ... من شنو ؟؟؟ يبي يوصل ؟؟؟ وين؟؟؟ جهنم وين يعني
• زبونة تبي تنتقم من زوجها أو حبيبها عن طريق الانتقام من نفسها ... عبقرية !!!
• زبون يتفرج و ياخذ فكرة يمكن يسوي دراسة نفسية ... من سخافته تبي تضحك و تنام من البجي !!!!
• زبونة تبي ترقص و تهز و تتفصخ و تسوي الهوايل ... عشان تنسى ... تنسى شنوا ... تنسى وبس !!!!
• زبون دازينه المباحث يجيّك ان الامن مستتب و ان الحفلة بريئة !!!!
• زبونة فقيرة ياية تترزق ... ما عندها رولكس و مشتهية ساعة أوميغا و سوار الماس !!!
• زبون كان متدين و داخ من قرقرة المتأسلمين رايح يسوي فورمات حق مخه !!!
• زبونة تدور ريل أهبل (وايديين لا تستغرب) يداري على فضيحة بطنها !!!
• زبون واصل حدّه لعدة أسباب غير لائقة !!!
• زبونة هبلة ساحبينها و ما تدري شالطبخة قايلين لها في عرس !!!!
• زبون داش يلقط أوادم للبيع خارج الكويت !!!
• زبونة توزع علك بو قطو كل ما تعلك فيه تبي بعد !!!
• زبون يبي يثبت حق الداخلية ان لو يصيدونه يطلع !!!!

بالاضافة الى المجرمين و المساطيل و الحشاشين و الشواذ و الشراذمة من المتأسلمين و العلمانيين و الليبراليين و البوهيميين و التحررين و أحيانا الرجعيين السوقيين!!!! ... طبعا مشروع الفرفشة ما يبيله راس مال قوي و أرباحه ترفع البورصة ما تنزلها طبعا بعد ما يقرر المالك التوبة و تطهير أمواله في السوق و عمل الخيرات و ملاجئ الأيتام و حفر الابار في دول متروسة أنهار (طوّف يا الغالي) ... و القائمة لا تنتهي و كل ما نصرف فلوس زيادة لركاز و أشباهها للتوعية الدينية تزيد المقار الفرفشية !!! شالسالفة !!! أعتقد يجب أن يعلن المتأسلمين فشلهم للاصلاح الاجتماعي و التركيز على مبادئ الأخلاق الاساسية فقط : الصدق و الأمانة و بعدين نتفاهم بالبقية... بس رحم الله والدينكم لا يطلع خبل مبرمج يبي ينهي عن المنكر بطريقة عنيفة ... ترى مو ناقصين عوار راس... ستروا علينا الله يخليكم ... و السلام ختام